Vive a maxia do lusco e fusco coa micropoesía de Ajo e o pop de Dejavú

Esta fin de semana, a poesía e a música agardan por ti de novo na Cidade da Cultura. Serán dúas citas cheas de emoción, calor e beleza para vivir a maxia do solpor na compaña da micropoeta Ajo e o grupo uruguaio Dejavú, dentro do ciclo Atardecer no Gaiás.

“Vuelvo enseguida / no me esperéis”. Así se despide ás veces Ajo, a micropoeta. A muller que fundou, xunto Javier Colis, Mil dolores pequeños. A colaboradora de Julieta Venegas e Escohotado, a que mete ao público no peto en cada recital. Punzante e divertida, íntima, breve ata a última consecuencia, Ajo debulla poemas como quen lanza dardos cheos de tenrura, de ironía, de realidade.

Ajo, micropoeta, cantante, axitadora cultural, achegará mañá venres a súa fascinante proposta literaria á Cidade da Cultura nun novo Atardecer no Gaiás. Estará acompañada por Judith Farres, encargada de debuxar paisaxes sonoros co seu clarinete e un set de DJ.

E o sábado, a praza central do Gaiás convértese de novo no mellor escenario musical co concerto de Dejavú. Herdeiros de bandas como Los Rodríguez ou Ariel Rot, os de Montevideo debullarán os temas do seu disco “Siembre hay mar”, no que destilan o seu pop clásico e cheo de lembranzas.

Vémonos ás nove na praza.

Música & Escena
Santiago de Compostela, 28 de Xullo de 2011 a Santiago de Compostela, 06 de Setembro de 2012