Baile de Entroido no Gaiás

Este marzo, o mellor baile de Entroido está no Gaiás. O vindeiro luns, 3 de marzo, a partir das 17:00 horas, só por vir disfrazado, poderás pasar unha divertida tarde cos musicais A nena e o grilo e Petit Pop totalmente de balde.

Para arrancar a tarde embarcarémonos xunto A nena e o grilo nunha emocionante aventura coa que descubrir o mundo e os seus segredos. Unha viaxe teatral con banda sonora en directo liderada por Magín Blanco. Tras esta viaxe iniciática chegará a hora do pop máis molón. Formigas, queixo branco, unha visita ao zoo ou aventuras de piratas serán os protagonistas de Petit Pop, un concerto máis que divertido no que o público terá moito que dicir.

Obradoiros de máscaras e perrucas

E para acudir perfectamente disfrazados ao Baile de Entroido, a Cidade da Cultura organiza dous obradoiros creativos para nenos a partir de seis anos.

O sábado 1 de marzo terá lugar no Museo Centro Gaiás o obradoiro de perrucas Despelúxate! coa artista Akira Valero. En dúas quendas (11:30 e 17:00 horas), os participantes aprenderán a reutilizar obxectivos xa usados como envases de plástico, papel, tubos de cartón ou cintas e cores para confeccionar unhas vistosas e divertidas perrucas coas que será difícil que os recoñezan.

E o luns 3 de marzo será o momento de cambiar de cara nun divertido obradoiro de máscaras. Escolle ollos, narices e orellas e convértete nun monstro terrible ou nun tenro, nun ser fantástico cun só ollo, nunha meiga encantadora… Vai cara! Obradoiro de máscaras de monstros e seres fantásticos dirixido por Manuel Silva estimulará a creatividade e a imaxinación dos máis pequenos.

Ambos os dous obradoiros xa están á venda a un prezo de tres euros no Punto On da Cidade da Cultura, ao que haberá que engadirlle os gastos de xestión no caso de adquirirse en www.servinova.com.

 
En familia
Santiago de Compostela, 12 de Febreiro de 2014