O testemuño documental máis antigo dos Parlamentos en Europa | Galicia, un relato no mundo

Quizais un dos antepasados máis antigos da Constitución sexa este pergamiño que se exhibe en Galicia, un relato no mundo. Cedido pola catedral de Ourense, este manuscrito de oitocentos anos é considerado un tesouro bibliográfico. O seu valor único fixo que a UNESCO o incluíse na Memoria do Mundo, arquivo internacional de documentos imprescindibles para entender a evolución da humanidade. De feito, este texto e o Códice Calixtino son os dous únicos documentos galegos que forman parte desta selecta escolla. Mais cal é razón da súa excepcional importancia? De que fito histórico tan relevante nos fala? Esta é a historia dos Decreta Regia, o testemuño documental máis antigo da orixe dos Parlamentos en Europa:

No ano 1188, Alfonso IX, rei de León e Galicia, soterrado no Panteón Real da Catedral de Santiago, tomou unha decisión revolucionaria na Idade Media: convocar, xunto á nobreza e á Igrexa, a cidadáns elixidos nas súas vilas e pobos para manter a paz nos territorios da Coroa. O mandato do monarca quedou rexistrado para a historia nun texto enviado desde a Corte ao Bispo de Ourense. O que este manuscrito recolle é, polo tanto, o xermolo do principio político que continúa a ser a base de calquera sistema parlamentario actual: darlle voz ao pobo.

Pasarán séculos ata que xurdan os parlamentos coma hoxe os coñecemos, mais a decisión de permitir á comunidade participar na administración dos asuntos do reino reflicte un modelo de goberno orixinal no marco das institucións medievais en Europa.

Agradecemos á Catedral de Ourense que preservase un documento esencial para comprender as orixes dos parlamentos e a súa xenerosidade permitindo a divulgación dunha obra que ilustra con elocuencia o impacto de Galicia na historia do mundo.

Santiago de Compostela, 06 de Decembro de 2019