Sala de prensa

 
Santiago, 27 de Maio de 2013
Xesús Vázquez inaugura no Museo Centro Gaiás a exposición "Orinoco. Viaxe a un mundo perdido", unha das mostras de arte étnica latinoamericana máis importante do mundo

O conselleiro de Cultura e Educación destacou que o Museo da Cidade da Cultura é o primeiro centro de España e Portugal en exhibir a Colección Orinoco
Vázquez Abad amosoulle o seu agradecemento a Patricia Phelps e Gustavo A. Cisneros “por ver na Cidade da Cultura un espazo no que promover en España a cultura latinoamericana”
A mostra consta de 1.135 pezas das doce etnias do Amazonas venezolano, 120 imaxes de Edgardo González Niño e Charles Brewer-Carías e unha pequena colección sobre a tradición fluvial galega

Santiago, 13 de Marzo de 2013
A Consellería de Cultura e Educación anuncia que o Gaiás será o primeiro centro da Península Ibérica en exhibir a ‘Colección Orinoco’ da Fundación Cisneros

Esta exposición será integramente patrocinada pola Fundación Gaiás, sen custo, polo tanto, para a Xunta de Galicia. 'Orinoco. Viaxe a un mundo perdido’ é unha das mostras de arte etnográfico latinoamericano máis importantes do mundo.

Santiago, 14 de Febreiro de 2013
Aberto o segundo prazo de inscrición para o espazo de coworking “Emprende Cultura Gaiás”
Coworking “Emprende Cultura Gaiás”

Agadic e a Fundación Cidade da Cultura de Galicia veñen de abrir o segundo prazo de inscrición para o espazo de coworking “Emprende Cultura Gaiás”, no que profesionais das industrias culturais poderán alugar un espazo onde desenvolver o seu proxecto. Tras a oferta inicial de 20 prazas, amplíase a convocatoria baixo as mesmas condicións: aluguer dun espazo de traballo por 120 euros ao mes por un período inicial de seis meses, prorrogable ata un máximo de tres anos.

Santiago, 18 de Xaneiro de 2013
O Museo Centro Gaiás permanecerá pechado o 25 de decembro e o 1 de xaneiro

A consellería de Cultura, Educación e Ordenación Universitaria informa que os vindeiros 25 de decembro e 1 de xaneiro, o Museo Centro Gaiás permanecerá pechado ao público. Durante estes dous días festivos, o visitante non poderá acceder ás exposicións Gallaecia Petrea e Códices. Xoias das Catedrais Galegas na Idade Media. A excepción destes dous días, o Museo Centro Gaiás manterá abertas as súas portas durante todo o Nadal no seu horario habitual: de 11:00 a 20 horas agás os luns que permanece pechado por descanso do persoal.

Santiago, 18 de Xaneiro de 2013
O Centro de Emprendemento Creativo permanecerá pechado ata o xoves pola desmontaxe da exposición de Granell

O Centro de Emprendemento Creativo da Cidade da Cultura de Galicia permanecerá pechado ata o xoves desta semana pola desmontaxe da exposición O Encontro na poética de Eugenio Granell. A finalización desta mostra, coa que se conmemorou o centenario do xenio surrealista, obriga a pechar o edificio –antigo Arquivo de Galicia- ao público para facilitar a desmontaxe dos tres pavillóns que acollían as pezas procedentes da Fundación Granell.

Páxinas