Letras Galegas 2022 | Florencio Delgado Gurriarán na Biblioteca de Galicia

A Real Academia Galega resolveu dedicar as Letras Galegas 2022Florencio Delgado Gurriarán (Córgomo de Valdeorras, 1903 - Fair Oaks, California, 1987). A Biblioteca de Galicia, como todos os anos, quere sumarse a esta conmemoración cunha mostra bibliográfica que permitirá achegar aos cidadáns algunhas das obras que custodia nos seus fondos deste orixinal poeta, comprometido coa súa terra e coa defensa dos valores democráticos.

Foi Florencio Delgado Gurriarán un autor cuxa biografía percorre practicamente todo o galeguismo do pasado século XX, dende experiencias como a do Seminario de Estudos Galegos (1923), o Partido Galeguista, o rexurdimento literario dos anos 30 ou a defensa do Estatuto de Autonomía do 36, ata momentos tan dramáticos como a guerra civil (1936-1939) e o exilio.

Trátase, de feito, do primeiro homenaxeado no Día das Letras Galegas que representa aos intelectuais do exilio mexicano, que ao igual que o bonaerense, frutificou en numerosas iniciativas culturais e proxectos editoriais de diversa índole.

Esta pequena exposición pretende mostrar a obra máis significativa do escritor ourensán e dar a coñecer os lugares onde transcorreu a súa vida, tanto as terras valdeorresas ás que tanto cantou nos seus versos, como as mexicanas que o acolleron e tamén influíron na súa poética, chegando a empregar, mesturadas, verbas crioulas autóctonas e termos galegos dialectais.

Contido:

A exposición para conmemorar a figura de Delgado Gurriarán conta con arredor de 40 pezas, entre libros, xornais, cds ou revistas. Todas elas pertencen ás coleccións da Biblioteca de Galicia e permitirán achegarse a produción bibliográfica, tanto propia como allea, relacionada co homenaxeado no Día das Letras Galegas neste 2022. Os exemplares da revista Vieiros, fundada por Gurriarán en México e que proximamente poderá consultarse en Galiciana-Biblioteca Dixital de Galicia, os poemarios Bebedeira ou Galicia infinda, así como algúns dos máis recentes estudos sobre a súa figura, son só unha mostra das obras seleccionadas polos técnicos da Biblioteca de Galicia para contribuír a poñer en valor a figura do que foi una gran activista en prol da identidade cultural de Galicia.

Obras destacadas:

- As primeiras edicións dos 4 libros de poesía de Gurriarán:

  • Bebedeira, publicado pola editorial Nós en 1934
  • Galicia infinda, publicada en Vigo por Salnés en 1963
  • Cantarenas: poemas 1934-1980, de Edicións do Castro (1981)
  • O soño do guieiro: poemas, poemiñas e poemoides, de Ediciós do Castro e publicado en 1986

- Primeiras edicións dos libros nos que colaborou e que reflicten as súas facetas de tradutor e activista cultural:

  • Poesía inglesa e francesa vertida ao galego, publicado en Bos Aires por Alborada en 1949
  • Presencia de Galicia en México, editado polo Padroado da Cultura Galega no país azteca en 1956

-Destacan, ademais, os 4 únicos números que saíron do prelo da revista Vieiros, impulsada por Gurriarán no seu exilio mexicano.

 
Exposicións
 
27 Set - 18 Dec de 2022
De 10.00 a 20.00 horas
De martes a domingo
16 a 20 h | Sáb-Dom e festivos tamén de 11 a 14.30 h
21 Out 2022 - 17 Abr 2023
De martes a domingo | De 10 a 20 h
11 Nov 2022 — 9 Abr 2023
De martes a domingo | De 10 a 20 h
De Nov 2022 a Mai 2023
De 9.00 a 21.00 horas
18 Nov 2022 a 28 Xan 2023
De 11.00 a 20.00 horas
21 Nov 2022 a Xan 2023
De 9.00 a 21.00 horas