[ Fotografía de banner de cabeceiro: María Arceo, realizada por Matthew Joseph ]

Con motivo da celebración do Día Internacional do Medio Ambiente (5 de xuño) as Torres Hejduk, da Cidade da Cultura de Galicia, acollerán a intervención artística Plástico a mareas de María Arceo, compostelá residente en Londres desde 1984, onde se graduou en Belas Artes na Escola de Arte de Camberwell e máis tarde cun Posgrao en Arte e Educación do Deseño da Universidade de Goldsmith. As súas obras sempre teñen unha forte carga de denuncia dos danos medioambientais que está a provocar o exceso de lixos e residuos que xera a sociedade actual.

Precisamente, Plástico a mareas trátase dunha intervención, co patrocinio de Viaqua, para alertar da destrución ambiental polo desmedido consumo de plástico e advertir dos graves riscos de contamimación do medio, e sobre todo dos fondos mariños.

Neste caso, María Arceo empregará para a súa intervención refugallos de plástico recollidos no litoral da costa galega. O obxectivo é recrear nas Torres Hejduk —espazo da Cidade da Cultura destinado a intalacións artísticas— unha experiencia de percepción multisensorial, de carácter inmersivo, coa intención de provocar fisicamente os e as asistentes; transportalos ao mesmo fondo do océano e, desa maneira, proporcionarlles a oportunidade de visualizar e percibir a través de cheiros, sons e luces, non só os problemas que a presenza de plásticos xera na auga, senón que, finalmente, se consiga estimular e espertar hábitos de consumo responsable.

Por que pedimos a túa colaboración?

• Se de xeito individual —ou dentro dun colectivo ou asociación— estás tamén a limpar praias galegas de refugallos plásticos, gustaríanos que fose este material o que, xunto ao que está a recoller a mesma María Arceo, o que formase parte da intervención.
• Precisamente, a artista compostelá —residente en Londres— estará no mes de maio facendo limpeza de plásticos en zonas do litoral galego para esta intervención nas Torres Hejduk, polo que estaría disposta a participar e ser convidada en recollidas organizadas.
• Pola túa colaboración, estás convidado/a á inauguración o 5 de xuño da intervención Plástico a mareas, para que vexas o resultado da túa aportación, á vez que como pequeno detalle de agradecemento polo teu xesto solidario e de respecto medioambiental.

Que tipo de material precisa a instalación artística?

• Todo tipo de plásticos recollidos nas praias e no litoral galego, desde refugallos plásticos como botellas, tapas, bolsas... ata redes, cordóns ou paus-tiburón das bateas.

Onde e como facer a entrega?

• Cidade da Cultura, na área de servizo das Torres Hejduk
• Para outras entregas fóra da Cidade da Cultura, contactar con María Arceo no Tfn. 698 152 968 e na dirección de correo electrónico maria@mariaarceo.com

•  María Arceo.
• Contacto: maria@mariaarceo.com