A Fundación Cidade da Cultura de Galicia colaborará co Instituto Galego do Viño ofrecendo as instalacións do Gaiás para a organización da primeira edición do Curso Superior de Sumiller Profesional, iniciativa coa que se pretende avanzar na profesionalización dun sector punteiro na economía galega.
Este curso será presentado o xoves ás 18 horas no Gaiás, nun acto ao que asistirá a directora xerente da Fundación Cidade da Cultura de Galicia, Beatriz González Loroño, o secretario xeral do Medio Rural e Montes, Tomás Fernández-Couto, o director do Instituto Galego do Viño, Xoán Cannas, e no que a conferencia inaugural correrá a cargo de Xosé Luis Mateo, viticultor da bodega Quinta da Muradella e considerado un dos nomes de referencia na investigación dos viños de Monterrei.
Ademais de Xoán Cannas, Nariz de Ouro no 2004 e director deste curso, no equipo de profesores cómpre destacar a Josep Roca, sumiller e copropietairo de El Celler de Can Roca (tres estrelas Michelin), Ferrán Centelles, sumiller de El Bulli (tres estrelas Michelin), César Cánovas, mellor sumiller de España en 2006 e un dos dez mellores do mundo, Cristina Alcalá, directora da editorial Opus Wine y colaboradora de El País, Joan Gómez Pallarés, catedrático e vicerrector de Investigación da Universidade Autónoma da Barcelona e autor do blog De Vinis; Pepe Solla, dono e xefe de cociña de Casa Solla (unha estrela Michelin) e unha das referencias da gastronomía galega e do Grupo Nove; e Michael Wöhr un dos maiores coñecedores dos viños alemáns en España, socio fundador de Vins Alemanys.
Obxectivos do cursoEntre os obxectivos prioritarios do curso figura ofrecer formación especializada desde unha perspectiva integral, abordando tanto fundamentos de viticultura, enoloxía e cata como técnicas de marketing e protocolo. Do mesmo xeito, afondarase nos retos vinculados á internacionalización do sector, a través da procura de novos mercados e da mellora dos niveis de calidade e innovación.
O curso está dirixido a viticultores, enólogos, traballadores de bodegas, empresarios do sector hostaleiro de Galicia e o norte de Portugal, titulados en hostalería, distribuidores e importadores, xornalistas especializados, docentes de titulacións do ámbito vitivinícola e persoal de tendas especializadas.
Ao longo do ano abordaranse módulos formativos sobre técnicas de análises sensorial, variedades de uva, xeografía vitivinícola, enoturismo, marketing estratéxico, xestión de bodegas, servizos de sala, inglés do viño, habilidades comunicativas e mesmo un módulo sobre outros produtos de sobremesa.
O programa do curso consta de 300 horas teóricas, 320 horas de clases prácticas e elaboración do proxecto e 80 visitas culturais. O resto da información está dispoñible en www.institutogalegodovino.com.
Asemade, o curso de sumiller incluirá todo un programa de actividades, que terán como un dos espazos de referencia A Cantina do Gaiás-Cidade da Cultura de Galicia, gañadora dos “Restauran & Bar Design”, prestixiosos premios internacionais do deseño de establecementos hoteleiros.