A exposición Ferrol no tempo, organizada pola Xunta de Galicia, a través da Cidade da Cultura, e por Afundación, pechou as súas portas o pasado sábado na sede desta última entidade con 7.130 visitantes. A mostra, inaugurada o 18 de novembro, reuniu 115 pezas entre obras de arte, fotografías, documentos e mapas históricos e obxectos inzados de simbolismo, construíndo un relato único sobre a historia dunha urbe que embarcou a Galicia na modernidade.
Comisariada por Manuel Gago e co asesoramento do investigador especializado na historia de Ferrol, Guillermo Llorca, a exposición fixo un percorrido polo Ferrol naval, obreiro e ilustrado, do que puideron gozar 7.130 persoas. Destas, 308 participaron nas visitas guiadas organizadas cos comisarios e 1.100 corresponden ás actividades didácticas para centros educativos.
Ademais, a mostra complementouse con diversas iniciativas que contribuíron a espertar o interese pola evolución histórica da cidade. Entre estas propostas, realizouse unha visita coa veciñanza relacionada con algunhas das pezas exhibidas, como é o caso, por exemplo, da neta de Ángela Ruiz Robles, inventora da Enciclopedia Mecánica que puido observarse nunha das vitrinas da exposición. O pasado sábado tivo lugar unha última visita a modo de clausura na que tomou parte ao completo o comité asesor local da mostra, formado por expertos en distintas disciplinas.
Esta exposición forma parte do proxecto expositivo Cidades no tempo, que contempla unha mostra a cada unha das sete principais urbes galegas, poñendo en valor a identidade urbana de Galicia. Tras Santiago e Ferrol, en marzo chegará a Lugo.