O director xeral de Cultura da Xunta, Anxo Lorenzo, acompañado da directora-xerente da Fundación Cidade da Cultura, Ana Isabel Vázquez Reboredo, deu a benvida no Gaiás á escritora Ledicia Costas, que mantivo un encontro coas dez persoas participantes na Residencia Literaria 2022 que presta apoio e acompañamento a creadoras e creadores emerxentes e inéditos. Esta é unha das actividades organizadas para esta iniciativa enmarcada no Programa REGA: Residencias artísticas do Gaiás, que volven un ano máis para construir un espazo de guía, diálogo, escoita e análise.

A Residencia Literaria da Cidade da Cultura, dirixida polo profesor de escritura creativa, Javier Peña, conxuga o traballo sobre o proxecto literario propio de cada participante co estudo dos proxectos das compañeiras e compañeiros. Son 12 días compartindo inquedanzas e consellos, críticas e eloxios, para axudar ao crecemento literario e persoal das persoas participantes, nun ambiente distendido de confianza. Este tempo compleméntase con outras actividades como a conversa con dúas escritoras destacadas das letras galegas e españolas, como son Ledicia Costas e proximamente Marta Sanz. Ademais, onte os mozos e mozas realizaron unha visita organizada á Fundación Camilo José Cela e viaxarán a vindeira semana a Braga a unha das feiras do libro máis importantes de Portugal.