Ningún dos cinco ten máis de 13 anos, pero xa poden presumir de ter gravado un disco nos míticos estudios Abbey Road de Londres. Son de Pontevedra e chámanse Furious Monkey House, a banda infantil revelación. O seu primeiro álbum "Run" deixa claro que a súa formación musical ten máis que ver cos Smashing Pumpkins ou Nirvana que cos Auryn. O sábado 2 de xaneiro tocarán no Gaiás, como prato forte dunha nova edición do festival solidario "Cancións x regalos", na que tamén estarán Eladio Santos, o cantante da banda "Eladio e os Seres Queridos", e Sleeping Cat, grupo galego liderado por Jerry Noia.

"Cancións por regalos" volve fiel a súa fórmula na que para poder entrar a estrear o ano con enerxía e boa música non é preciso mercar entrada: abonda con traer un regalo para donar á "Asociación de Iniciativa Social Berce", que logo os distribuirá entre familias sen recursos de Galicia.

O festival terá lugar a partir das 17  a 19 h. na planta -1 do Museo Centro Gaiás. Jerry Noia de Slepping Cat será o primeiro en subir a escena cun concerto especial con guiños ao público infantil. Seguirá Eladio Santos, que traerá tamén una actuación especial e finalmente serán os Furious Monkey House os que pecharán ao redor das 18 h. o festival cunha actuación na que presentarán os temas do seu álbum "Run".