Carta de Santiago | Diálogos para unha sociedade de futuro

Carta de Santiago é un evento aberto con vocación de dar voz á comunidade global nun momento de profundas reformulacións e cambios de valores trala crise epidemiolóxica. Durante tres días, personalidades de varias disciplinas sociais e culturais, do panorama estatal e internacional, daranse cita para debater sobre os retos de futuro do século XXI. O proxecto está impulsado pola colaboración da Xunta de Galicia e a Fundación Paideia Galiza no marco do Xacobeo 21-22.

Carta de Santiago nace coa vocación de debater e reflexionar sobre diferentes ámbitos da cultura e das artes, a economía, o medio ambiente, a ciencia ou a tecnoloxía. Para iso contaremos con destacadas personalidades nestes ámbitos que achegarán a súa visión sobre os grandes retos globais aos que se enfronta a sociedade actual. Durante os días 5, 6 e 7 de novembro a cidade de Santiago de Compostela acollerá un foro internacional que pretende ser un espazo de reflexión, diálogo e debate sobre 21 temáticas relevantes entre as que se atopan a transformación cultural, o cambio climático, os desequilibrios territoriais, a educación, a diversidade, o emprendemento ou a ciencia.

A través das diferentes achegas, tanto dos profesionais como da cidadanía, obterase unha serie de conclusións que se recollerán nun documento chamado Carta de Santiago. A súa finalidade será facer perdurables os acordos que nela se recollan, servindo como folla de roteiro para afrontar os retos aos que nos enfrontamos como sociedade.

Programa da Carta de Santiago

Gunter Pauli, autor da teoría económica da economía azul –e do best seller co mesmo título– será un dos relatores internacionais convidados a Carta de Santiago. O empresario belga, que está a revolucionar o debate sobre a sostibilidade, falará en Compostela sobre as claves para facer compatible compromiso medioambiental e crecemento empresarial promovendo unha economía baseada no binomio formado por creatividade e ciencia, co obxectivo de impulsar empresas que xeren beneficios respectando o planeta.

As persoas asistentes ao encontro escoitarán tamén a María Neira, a directora do Departamento de Saúde Pública da Organización Mundial da Saúde, que achegará o seu coñecemento e experiencia nun campo tan actual como o da saúde pública. Pese a ter que conectarse a distancia desde Glasgow, onde se atopa nesas datas participando na Conferencia das Nacións Unidas sobre cambio climático, a representante da OMS amosou o seu desexo de participar en Carta de Santiago, onde conversará con África González, galega que se ten convertido nunha das inmunólogas máis recoñecidas de España, ex directora do Centro de Investigacións Biomédicas e ex presidenta da Sociedade Española de Inmunoloxía.

Carta de Santiago tratará tamén temas de tanta actualidade como as crises migratorias ou o impacto e posibilidades das tecnoloxías para o cambio social. Farao con nomes como o da emprendedora francesa Joséphine Goube, creadora da plataforma Techfugees, coa que mobiliza a toda unha comunidade internacional de desenvolvedores e emprendedores sociais na creación de solucións que contribúan á inclusión das persoas refuxiadas, e que a fixo merecedora da distinción de Emprendedora Social da revista Forbes.

Desde o eido da tecnoloxía e as súas implicacións, o encontro contará tamén coa presenza de Daniel Innerarity, Premio Nacional de Ensaio, e unha das voces que mellor está a analizar as derivadas dun tema tan actual como a relación entre o respecto á privacidade e os algoritmos das grandes plataformas tecnolóxicas e redes sociais.

Mathilde Mesnard, directora de Asuntos Financieiros e Corporativos da OCDE e unha das maiores expertas na loita contra a corrupción e novos sistemas de goberno; e Carolyn Steel, especialista internacional no debate arredor das macro-urbes e no problema de alimentación nestas metrópoles –e autora de obras de referencia como Cidades Famentas e Sitopia– serán outras das figuras que se despracen en novembro a unha Compostela convertida en referencia do debate e axenda arredor da sostibilidade.

Desde o eido da cultura participarán tamén no encontro Pino Saglioco, presidente da Live Nation, promotor de xiras de artistas como Paul McCartney, Elton John, Lenny Kravitz ou Iron Maiden, que analizará os desafíos que está a vivir o sector cultural, especificamente o musical; ou Miriam Escofet, artista gañadora do BP Portrait –probablemente o premio máis prestixioso de retrato do Reino Unido–e elixida para realizar o retrato oficial da Raíña Isabel II.

Nomes como os da tamén artista Flavita Banana, a actriz Marta Larralde, ou os xornalistas Nacho Carretero ou Jorge Neri, entre outros, completan a nómina de relatores e relatoras do encontro correspondentes ao eido cultural.

Comité de co-creación

Para a selección de persoeiros nacionais e internacionais convidados a este foro, impulsouse un Grupo de Co-creación de galegas/os destacados pola súa relevancia en diversos campos de coñecemento e acción, encargados de conformar un programa de contidos e relatores/as. O comité de co-creación está formado por:

  • AMPARO ALONSO. Licenciada en Química. Doutora en Física. Catedrática da Universidade da Coruña e investigadora do CITIC (Centro de Investigación TIC). Presidenta da Asociación Española para la Inteligencia Artificial (AEPIA).
  • PEDRO CALAZA. Doutor Enxeñeiro Agrónomo pola Universidade de Santiago de Compostela. Doutor Arquitecto da Paisaxe pola Universidade de Lisboa. Director da Escola Galega da Paisaxe.
  • LUZ CASAL. Cantante e compositora. Premio Nacional de Músicas Actuales do Ministerio de Educación y Cultura en 2013.
  • MÓNICA FERNÁNDEZ-ACEYTUNO. Licenciada en Ciencias Biolóxicas pola Universidad Complutense de Madrid. Divulgadora de Natureza e Premio Nacional de Medio Ambiente “Félix Rodríguez de la Fuente de Conservación de la Naturaleza” en 2003.
  • CRISTINA FERNÁNDEZ-ARMESTO. Empresaria. Socia da granxa ecolóxica Casa Grande de Xanceda. Premio Empresarias de Galicia 2019.
  • ANA FREIRE. Doutora en Ciencias da Computación. Investigadora e docente na Universitat Pompeu Fabra en Barcelona. Premio Fundación Real Academia de Ciencias al Joven Talento Científico Femenino. Fundadora do Concurso Internacional Wisibilízalas.
  • CÉSAR DE LA FUENTE. Investigador en biotecnoloxía. Recoñecido polo MIT como un dos científicos innovadores menores de 35 a seguir.
  • FRANCISCO LEIRO. Pintor e escultor. Premio Nacional de Artes Visuales en 2008.
  • ISABEL LÓPEZ-CHAMORRO. Empresaria. Agricultora ecolóxica. Promove a primeira comunidade de vivenda compartida interxeracional de Galicia.
  • SANDRA ORTEGA. Licenciada en Psicoloxía. Presidenta da Fundación Paideia Galiza.
  • MARGA PAZOS. Xornalista e presentadora de televisión. Premio Mestre Mateo 2014 á mellor comunicadora de televisión.
  • ROMÁN RODRÍGUEZ. Licenciado en Xeografía e Historia. Conselleiro de Cultura, Educación e Universidade.
  • MARISOL SOENGAS. Xefa do Grupo de Melanoma do Centro Nacional de Investigaciones Oncológicas e Vicepresidenta da Asociación Española de Investigación sobre el Cáncer. “Medalla Fritz Anders” á Investigación en Cancro de Pel.
  • DOMINGO VILLAR. Escritor.