Xurdir, coa colaboración da Consellería de Cultura, Educación e Universidade, a través das secretarías xerais de Política Lingüística e de Cultura, organiza o luns 17 de maio de 2021 a VII edición da Carreira Camiño das Letras. Constará dunha proba absoluta das categorías máster, sénior, sub23 e sub20 que sairá a partir das 10.00 horas desde as proximidades do Pico Sacro e seguirá un circuíto de 15 km, seguindo a Ruta da Prata, ata a Cidade da Cultura, onde percorrerá o Bosque de Galicia e a Praza Central.
Esta carreira, que quere unir a práctica deportiva coa conmemoración do Día das Letras Galegas e co simbolismo do Camiño de Santiago, adáptase este ano ás novas circunstancias provocadas pola pandemia da covid-19 e, para evitar grandes concentracións de persoas, non celebrará as habituais carreiras das categorías infantís. Ademais, a organización do evento establecerá todas as medidas e controis sanitarios para garantir que a carreira se desenvolve con todas as medidas de seguridade.
Todas as persoas participantes que se inscriban na proba recibirán como agasallo, no momento da recollida do dorsal, un libro e mais o diploma Camiño das Letras.